ఇంటర్ కూడా లేని సచిన్..పుట్టినరోజు శుభాకాంక్షలు రామ్ సంచలన ట్వీట్

ప్రపంచ క్రికెట్‌లో తనకంటూ ఓ ప్రత్యేక స్థానాన్ని సంపాదించుకున్న రికార్డుల వేటగాడు. ఆయనే భారత క్రికెట్ దిగ్గజం, మాస్టర్ బ్లాస్టర్ సచిన్ టెండూల్కర్. నేడు(ఏప్రిల్ 24న) ఆయన పుట్టినరోజు.

భారత క్రికెట్‌లో అతనో సంచలనం. క్రికెట్ దేవుడిగా పిలిపించుకున్న ఘనత అతని సొంతం. ఎంతో మంది క్రికెటర్లకు అతని జీవితమే ఓ పాఠ్యాంశం. జీవితంలో ఎన్నో ఆటుపోట్లు, ఎన్నో అవమానాలు. అన్నింటికీ తన బ్యాట్‌తోనే సమాధానం చెప్పిన ఏకైక ఆటగాడు.

1973 ఏప్రిల్‌ 24న జన్మించిన సచిన్‌కు నేటితో 46 ఏళ్లు నిండాయి. సచిన్ పుట్టినరోజు దేశవ్యాప్తంగా ఆయన అభిమానులు ఘనంగా జరుపుకుంటున్నారు. ట్విట్టర్ ద్వారా ఆయనకు శుభాకాంక్షలు తెలియజేస్తున్నారు.

ఇలా పుట్టినరోజు శుభాకాంక్షలు తెలిపిన వారిలో టాలీవుడ్ ఎనర్జిటిక్ హీరో రామ్ పోతినేని కూడా ఉన్నారు. సర్వసాధారణంగా కాకుండా కొత్తగా, ఆసక్తికరంగా రామ్ శుభాకాంక్షలు తెలిపారు. ఆత్మహత్యలు చేసుకుంటోన్న ఇంటర్ విద్యార్థులను దృష్టిలో ఉంచుకుని ట్వీట్ చేశారు.

‘పార్క్‌లో కూర్చుని బిస్కెట్లు తినే పిల్లలకి ఎలా చెప్పినా వింటారు. బెడ్‌రూమ్‌ లాక్ వేసుకుని లైఫ్ ఎలా రా అనుకునే పిల్లలకి.. నిజాలు.. ఇలా చెప్తేనే వింటారు. ఇంటర్ కూడా పూర్తి చేయని, దేశం గర్వించదగిన వ్యక్తి సచిన్ టెండూల్కర్ గారికి జన్మదిన శుభాకాంక్షలు’ అని రామ్ తన ట్వీట్‌లో పేర్కొన్నారు.

అంటే, ఇంటర్ కూడా పూర్తిచేయని సచిన్ టెండూల్కర్ గొప్ప క్రికెటర్‌గా ఎదిగినప్పుడు.. ఫెయిల్ అయినంత మాత్రాన ఆత్మహత్యలు చేసుకోవడం ఏంటని పరోక్షంగా రామ్ ప్రశ్నించారు. సచిన్‌ను స్ఫూర్తిగా చూపించారు.

ఇదిలా ఉంటే, భారత క్రికెట్ జట్టుకు 24 ఏళ్ల పాటు ప్రాతినిధ్యం వహించిన సచిన్ టెండూల్కర్ తన పేరిట ఎన్నో రికార్డులు నెలకొల్పారు. 200 టెస్ట్ మ్యాచ్‌లు ఆడిన సచిన్ 15,921 పరుగులు సాధించారు.

 

అలాగే 463 వన్డేల్లో 18,426 పరుగులు చేశారు. ప్రపంచ క్రికెట్‌లో అత్యధిక పరుగులు సాధించిన క్రికెటర్‌గా చరిత్రకెక్కారు. అంతర్జాతీయ క్రికెట్‌లో 30వేల పరుగులు చేసిన ఏకైక ఆటగాడు సచిన్ టెండూల్కరే కావడం విశేషం.

క్రికెట్‌కు సచిన్ అందించిన సేవలకు గుర్తుగా 1994లో భారత ప్రభుత్వం అర్జున అవార్డుతో సత్కరించింది. 1997లో రాజీవ్ గాంధీ ఖేల్‌రత్న అవార్డు దక్కింది. పద్మశ్రీ, పద్మవిభూషణ్ అవార్డులు కూడా మాస్లర్ బ్లాస్టర్‌ను వరించాయి.

2012 డిసెంబర్లో ఇంటర్నేషనల్ వన్డే మ్యాచ్‌లకు సచిన్ రిటైర్‌మెంట్ ప్రకటించారు. 2013 అక్టోబర్‌లో క్రికెట్‌‌కు సచిన్ వీడ్కోలు పలికారు. అదే ఏడాది నవంబరు 16న దేశ అత్యున్నత పౌర పురస్కారం ‘భారత రత్న’ను అందుకున్నారు.

Leave A Comment

Your email address will not be published. Required fields are marked *